政Whats噏﹕黃錦星3人聚餐 公然違反禁聚令?

20201224
東網電視
更多新聞短片
黃錦星(中)喺社交網站上載相片,同沈祖堯(左)及黃傑龍聚餐。
第4波疫情持續,政府實施一系列防疫措施,問責官員當然要以身作則。但係環境局局長黃錦星竟然肆無忌憚咁,一行3人聚餐,竟然公然違反禁聚令?
黃錦星今日(24日)喺社交網站上載相片,以「傑龍祖堯、新舊交替」為題,見到佢同中文大學前校長沈祖堯及稻苗學會會長黃傑龍,喺餐廳嘆咖啡喎。黃錦星都「戴返頭盔」,講明係兩個月前嘅相片,當時聚餐係為咗商討環境運動委員會(環運會)嘅事宜。
政府今日公布委任新一屆環運會成員,黃傑龍將接替沈祖堯出任主席一職,而沈將於明年3月去新加坡南洋理工大學,擔任醫學院院長兼高級副校長,黃錦星感謝沈嘅貢獻,尤其喺疫情期間,推動抗疫時不忘環保;同時期望黃傑龍可以領導環運會,喺社會繼續宣傳環境保護訊息。
另外,黃錦星喺貼文中又話,期望垃圾徵費條例草案可以早日獲立法會通過,相信有助減廢回收,而且有利綠色經濟。最後,黃祝大家今個平安夜,健康平安,「宜散不宜聚」、「綠綠無窮」啊。