政Whats噏:容海恩被惡搞指將移居美國 澄清無興趣移民

2020年12月26日 11:55
東網電視
更多新聞短片
容海恩澄清並無申請移民美國。
網上盛傳議員容海恩(Eunice)準備移居美國,網民仲發起白宮聯署,希望「阻止」佢成為美國人。Eunice反寸多謝網民咁睇得起佢,澄清並無興趣申請移民喎。
隨着網民不斷炒作傳聞,Eunice都忍唔住要出面澄清,佢今日(26日)喺社交網站發文,話多謝網民咁睇得起佢,仲搞個白宮聯署「大龍鳳」,阻止佢移民美國。之不過佢話根本無申請移民美國、亦無興趣申請移民,最後仲話謠言止於智者。
網民設立嘅白宮聯署提到由於Eunice上年支持通過逃犯條例修訂草案,導致出現反修例風波;又話Eunice支持成立《港區國安法》,有份威脅香港嘅人權同法治,要求美方禁止Eunice嘅移民申請,截至截稿時,已經有逾3萬人簽署聯署。
仲有網民形容「袁家的花生show開始入場」,事關Eunice與丈夫袁彌昌一家嘅政治光譜極闊,一直受市民熱話。Eunice嘅「老爺」袁弓夷,喺反修例風波期間多次去美國進行游說工作,依家仲一直身處當地,有網民就寸Eunice係咪要去美國一家團聚喎。而袁彌昌嘅妹妹袁彌明亦曾經持有美國護照,之不過喺2012年參選立法會選舉時已經放棄持有外國護照喇。