政Whats噏:過於倚賴外判 林超英批政府未甦醒

20201228
東網電視
更多新聞短片
林超英指政府長時間倚賴並非扎根香港嘅顧問公司,會因為冇着手搞實務而培養唔到科技力量。
政府不時都會將部分工作外判,之不過成效係點就見仁見智喇。天文台前台長林超英日前以天文台嘅應用程式做例子,炮轟政府長時間倚賴顧問公司,漸漸連控制能力都冇埋,又提到港鐵沙中線工程爆出嚴重事故後冇人負責,但政府仲未甦醒,繼續倚賴顧問公司。其實爆出工程醜聞後,已經有唔少人要求運輸及房屋局局長陳帆下台,依家連林超英都咁講,陳帆係咪應該要檢討下呢!
其實政府搵外判真係好常見,唔單止基建工程,部分政府部門會將公關、設立應用程式等工作外判。林超英就話,由天文台開發嘅「我的天文台」流動應用程式並冇搵顧問公司,而係由天文台嘅員工動手解決。佢仲提到,話過往天文台員工會靠自己嘅科技知識去解決困難,例如喺80年代自製太陽能自動天氣站,仲定時以無線電方式將資料傳返香港、2000年代研究用激光探測機場範圍嘅風切變同納入航空警報服務、研製即時天氣預報系統等等。
有部門會自己落手落腳做,但亦有部門就搵外判仲搞出大頭佛添!就好似運房局咁,將港鐵沙中線工程外判出去,搞到醜聞百出,好似紅磡站出現月台鋼筋造假、擅改圖則、透工同埋監工紀錄造假等等,唔止沙中線,就連中環灣仔繞道、深圳灣大橋等工程,都曾經出現滲水、斷鋼纜等問題。
林超英就認為,政府長時間倚賴並非扎根香港嘅顧問公司,會因為冇着手搞實務而培養唔到科技力量,逐步流失專業同埋科技能力,最終連控制同監督顧問公司嘅能力都冇埋,搞到啲顧問公司坐大,目中無人。佢仲話,沙中線工程醜聞爆出後冇人負責,市民就無端端要承擔巨額嘅金錢損失,形容係非常不幸,但政府似乎仲未甦醒,繼續用大筆公帑去供養啲顧問公司。
依家科技日新月異,林超英都認為香港有充分力量去解決問題,唔應該再求教於所謂嘅「顧問公司」,仲希望可以了結目盲目倚靠「顧問公司」嘅時代。不過學佢話齋,政府到依家都未瞓醒,睇嚟林超英依個願望都要落空喇!