政Whats噏：周庭獄中編配洗衣房　怕凍着7件衫上身保暖

前香港眾志成員周庭早前申請保釋外出等候判刑上訴被拒，保釋唔到嘅佢今個聖誕節就喺羅湖懲教所過，有區議員喺聖誕當日（25日）去探監，話可能天氣凍，加上周庭本身都好怕凍，所以見佢當日都着咗7件衫先夠暖。其實睇返天文台記錄，當日北區嘅最低溫度係攝氏16.8度，咁嚟緊除夕(31日)凍到攝氏7度，到時點算呢？

話說周庭早前承認喺舊年6月21日參與及煽惑包圍灣仔警察總部的未經批准集結，被判監10個月，佢之後就判決上訴，並同步申請保釋外出等候上訴，但後者就畀高院原訟庭以「未能證明減刑上訴有極高成功機會」而拒絕。

喺周庭影片頻道今日發布嘅影片中，見到南區區議員袁嘉蔚喺聖誕節帶咗一啲書本、畫冊、女性用品等物品去探周庭，並喺探監後指周庭喺獄中覺得好凍。因為袁嗰日見周庭包到成隻糉咁，着咗足足7件衫先夠暖咁話。

袁又轉述周庭話依家喺監獄有報蛋糕班玩吓，而周庭喺入面被編配到洗衣房，每日所有囚犯嘅衫佢都有份洗。話時話，周庭咁怕凍，過兩日冷風殺到，唔知佢要着幾多件衫先夠暖？

前香港眾志成員黃莉莉、鄭家朗、廖偉濂、何嘉柔同朱恩浩接受傳媒訪問，話6月中至整個7月，迎接《港區國安法》實施，係最緊張嘅時期，形容大家已經喺斷頭台上，只係思考邊個會先被開刀。佢哋又話，對於眾志解散，覺得好可惜，當周庭、黃之鋒同林朗彥入獄，先發覺佢哋嘅存在係好重要咁話。