政Whats噏：公民議政平台夭折　籌委轟全因民主黨公民黨杯葛

多名民主派區議員牽頭發起將成立「香港公民議政平台」，指就香港問題與民共議，仲預先張揚喺大除夕，即係今日(31日)宣布正式成立平台，但平台未成立就夭折，佢哋喺記者會上宣布籌備委員會解散，仲爆出係因為有部分傳統民主派不願意合作。消息一傳出，多名民主派人士喺社交平台爆發罵戰，有啲仲鬧爆搞到平台夭折，原因係民主黨同公民黨杯葛。咦！睇嚟成班人鬼打鬼喎。

籌委會話部分民主派不願合作，令平台進展受阻；加上民政事務局局長徐英偉指平台違法後，部分傳統民主派人士更加與平台割席。籌委會認為既然唔能夠達到當初團結各黨派的目標，就決定即日解散。籌委會發言人、離島區議員梁國豪話曾再三邀請傳統民主政黨加入平台，但只收到「暫不討論」的回覆，令事情膠着。而當有消息指中央政府有可能取消區議會資格時，傳統民主政黨更是和平台「割席」，唔畀所屬政黨嘅區議員參加平台。

梁強調平台只是討論時事、為民發聲和反映民生議題，希望達到跨區合作，故絕不存在建制派人士，以至徐英偉所指係違法平台，亦冇涉嫌違反《港區國安法》。梁又重申，籌委會方針同架構一直保持開放及調整，絕非由本土派主導，對於因有人杯葛籌委會而夭折感到可惜，對一直協助同話願意加入嘅區議員表示謝意，又向全香港市民致歉，亦希望將來會有人重新帶頭建立新嘅民間議政平台。

雖然現場無問答環節，但網上嘅辯論就好激烈，揭示民主派一直存在嘅內部矛盾。例如籌委會秘書、中大學生會前會長周竪峰直指平台夭折嘅原因係民主黨同公民黨杯葛，指兩黨喺本月22日收到取消區議員資格嘅消息後，立即公開割席，並禁止黨員參與平台，導致平台在最後一刻難產。

沙田區議員趙柱幫就話對解散平台一事感可惜，認為傳統泛民政黨的傲慢和成見令合作困難。佢亦提及大多保守勢力認為新進力量係要搶奪話語權，影響佢哋固有嘅政治勢力。

面對相關嘅指摘，依家由羅健熙做主席嘅民主黨就回應話明白平台嘅籌委面對強大政治壓力同政府嘅打壓風險，理解佢哋嘅最終決定，又話嗰個平台從來冇邀請政黨參與，只以區議員的個人身份組成，該黨亦從冇阻止黨員參與，對無法溝通一說感到詫異。該黨又話不論傳統民主派政黨參與與否，各式各樣嘅平台依舊可以無懼政權打壓成立同運作，該黨會繼續同公民社會各團體按議題合作。

民主黨就推到一乾二淨，話冇杯葛喎，唔知公民黨主席梁家傑又點回應呢？