政Whats噏:公民議政平台日前夭折 籌委間因聲明爆內訌

20210102
東網電視
更多新聞短片
王進洋同張文龍、梁國豪喺Facebook爆發罵戰。
由部分民主派及抗爭派牽頭嘅「香港公民議政平台」原定大除夕日(12月31日)正式成立,但佢哋當日喺記者會上宣布平台「難產」,仲發聲明將矛頭指向傳統泛民同平台「割席」,再次暴露泛民陣營內部嘅世代矛盾。之不過,原來戰火亦蔓延至籌委會嘅委員之間,甚至喺網上引發罵戰,有人更忍唔住「爆粗」添!
離島區議員王進洋就喺Facebook發貼文,話自己係「有份表態決定議政平台要照搞」,形容喺大是大非下「DQ(褫奪議席)咪DQ囉」,仲話:「冇X咗個議席又點,冇咗泛民自己唔搞得?」同屬離島區議員、擔任籌委會發言人嘅梁國豪就留言話「你快d搞啦」,但王就回覆話:「咁X多條戰線一定要搞議政平台?」
而同屬籌委嘅葵青區議會副主席張文龍亦有留言,批評話「你係最冇資格講(聲明)唔代表你」,質疑出現呢個結果在於王一直唔嚟開會。王就回應,話自己「打從一開始就唔想參加個平台」,仲叫張唔好岔開話題。而張就強調王一直「無退過籌委」,話若果佢當時已經退出,自己「唔會怪你講呢番話」喎。事到如今,議政平台成立唔到仲嘈餐飽,真係攞嚟搞喇。