政Whats噏：梁美芬倡引入「紅黃牌」制　行為不檢議員「停賽」

足球員犯規輕則會被黃牌警告，重則會被紅牌趕出場。立法會議事規則委員會聽日(6日)召開特別會議，議員梁美芬今日(5日)去信委員會主席謝偉俊，再次提出應參考海外議會做法，引入「紅黃牌」嘅懲罰機制，嚴懲行為不檢嘅議員。

梁舉稱，委員會可參考英國下議院考慮引入俗稱「紅黃牌」嘅「停賽」機制，會議上行為極不檢點的議員，唔單止會被趕離場，更加會被禁止出席會議一段時間，「停賽」期間唔會獲得薪金，初犯會被禁止出席5個會議日，再犯會被罰「停賽」20個會議日，增加《議事規則》的阻嚇力。

受疫情影響，立法會最近開始使用視像軟件召開非正式會議，梁美芬表明贊成秘書處嘅建議，利用網上視像形式舉行委員會嘅正式會議，希望善用科技減低疫情對立法會的工作嘅影響。佢期望秘書處用「先易後難」嘅原則，累積一定經驗後，容許喺緊急同特殊嘅情況下以網上視像形式舉行立法會、內務委員會、財務委員會同轄下嘅小組委員會會議。