政Whats噏:寒冷天氣警告持續生效 政府橫額竟提醒大家防中暑

20210109
東網電視
更多新聞短片
陳沛然話政府冇理由掛啲過時嘅橫額。
最近天氣嚴寒,天文台多次發出寒冷天氣警告,不過醫學界議員陳沛然(Pierre)就發現,政府喺多區掛上「五招防中暑」嘅橫額喎。究竟邊個嘅體質異於常人,會喺咁凍嘅情況下中暑呢?
Pierre喺Facebook上載圖片,可見街道欄杆上有政府宣傳橫額,提醒大家要遮蔭乘涼,慎防中暑。之不過,今日(9日)市區普遍氣溫得約攝氏6至8度,亦大致多雲,政府係咪提醒市民要禦寒呢?之後我哋問返Pierre,對於政府掛錯橫額,佢話可能政府太忙唔記得換,不過都認為橫額配合返時節先合適,希望政府下次唔好喺夏天祝香港市民聖誕快樂咁話喎。
另外,Pierre話近排有唔少人有低溫症,患者一般需要個幾兩個禮拜先好得返㗎。有見及此,佢就索性做埋政府嗰份,喺社交平台提醒大家注意保暖,亦呼籲市民照顧身邊嘅長者同埋慢性疾病患者喇。