政Whats噏：非法餵飼動物檢控數字低　 何俊賢批未反映實際情況

野豬問題困擾本港多年，漁農界議員何俊賢日前向政府提出書面質詢，跟進野豬避孕或絕育，以及非法餵飼野生動物等問題。不過睇嚟何就唔係好滿意政府嘅回覆，仲批評政府最新一年非法餵飼動物檢控數字低，未反映實際情況。

政府指2019年涉及非法餵飼野生動物而被檢控個案有36宗，成功檢控嘅有35宗，最高罰款為2000港元。何批評，2019年嘅成功檢控個案竟然比2015年少，質疑未能反映實際情況，認為政府必須修改條例，提高具阻嚇性嘅罰則同埋加強執法。

佢話雖然政府聲稱，會利用紅外線相機估算全港郊野地區嘅野豬數目同埋繁殖趨勢，但就冇講明相機擺放嘅位置，數字都未包括社區出現嘅野豬，認為政府答覆中嘅野豬估算數目並唔準確。佢仲強調人同野生動物可以共融，不過兩者都需要有足夠空間，指目前野豬在市區造成持續滋擾係不爭嘅事實，而政府嘅回覆亦有改善空間，嚟緊會繼續跟進喎。