政Whats噏：疫下開會形式現分歧　灣仔區會又再流會

受疫情影響，民政事務總署早前曾要求區議會暫停或者推遲會議，但灣仔區議會今日(12日)如期召開第9次大會，會議原定下晝2點半開始，主席楊雪盈話，未夠法定人數開會，叫秘書同工作人員打電話問無請假嘅議員係咪去緊會場，直到下晝2點45分，由於只得5個區議員出席，仲差2個人先至夠法定人數開會，楊宣布流會，佢對區議會連續兩次流會感到失望同遺憾，認為一眾區議員作為民選代表，理應出席會議，履行議員職責。

缺席嘅區議員究竟去咗邊度呢？區議員梁柏堅喺流會後大約15分鐘，上載相片到社交平台，原來佢同另外3位區議員張嘉莉、邱汶珊、李永財，去咗民政事務總署遞交抗議信，要求總署更改指引，敦促民政處喺做好防疫措施嘅前提下舉行區議會會議，或者好似其他政府部門一樣舉行視像會議，並統籌各政府部門出席，畀區議員能夠有效執行職務。

至於區議員黃宏泰就指疫情嚴峻，會議前曾通知主席楊雪盈，今日將缺席會議。不過楊就拒絕黃嘅缺席申請，話區議員只能以身體不適為由告假。

區議員陳鈺琳對流會表示可惜，並舉例指立法會公務員及資助機構員工事務委員會、環境、福利事務委員會等過去曾以視像形式舉行會議，佢本人亦曾經出席社會福利署舉行嘅東區及灣仔區安老服務協調委員會嘅視像會議，認為政府部門並非無能力透過視像形式舉行區議會。副主席麥景星話疫情爆發以嚟，好多政府部門已採用視像形式舉行會議，質疑灣仔民政處點解連區議會開會嘅基本要求都唔能夠配合，批評政府同民政處過去經常拉隊離場係導致區議會失效嘅一方，麥希望民政處下個禮拜四(21日)能支援同配合區議會，安排政府官員出席大會。