政Whats噏：大嘥鬼出「閃卡」　懷舊MK文字宣揚環保

政府最受歡迎吉祥物「大嘥鬼」有「閃卡」流出！過去一直諗頭多多、經常用唔同方法宣傳環保資訊嘅「大嘥鬼」，尋日(12日)竟然就喺Facebook上載自己嘅「閃卡」，見到卡上面無着衫、光禿禿嘅佢就拎住個環保袋出街購物。佢仲用懷舊「MK文字」發貼文，向全世界宣告自己「醉曖環保」（最愛環保）添！

雖然「大嘥鬼」呢隻卡通公仔過去一直都用唔着衫嘅形象示人，但諗到用「閃卡」同「MK文字」嚟宣傳環保，呢條橋都真係幾爆喎！「大嘥鬼」就話：「其實做甘多嘢，刀系想大家米嘥嘢！」（其實做咁多嘢，都係想大家咪嘥嘢！）

貼文大打懷舊風，當然吸引咗唔少網民留言。有人就問「大嘥鬼」，究竟卡背後有冇印到佢首廣告宣傳歌嘅歌詞？亦有網民唔單止想要「大嘥鬼」嘅「閃卡」，更加問有冇「星星閃特別版」添！唔知環境局局長黃錦星又會唔會為環保而「犠牲」呢？