政Whats噏:張竹君日日見 梁美芬促陳肇始交代人手分配不均

2021年01月14日 16:13
東網電視
更多新聞短片
陳肇始喺書面答覆中「耍太極」,梁美芬激到紥紥跳。
本港疫情已經持續1年,但政府抗疫手法毫無長進。議員梁美芬(Priscilla)不滿政府抗疫表現,又質疑食物及衞生局轄下人手嘅工作分配不均,但陳肇始答非所問,激到Priscilla紥紥跳,反問「局長答咗啲乜嘢」?
尋日(13日)嘅立法會大會上,有4位議員提交嘅口頭質詢都係要求陳肇始回應,之不過眾人都唔滿意佢嘅口頭答覆,仲有議員叫佢提早退休添。但估唔到陳肇始連書面答覆都搞唔掂,Priscilla早前提出書面質詢,要求政府交代抗疫工作表現,當中提到衞生防護中心傳染病處主任張竹君,過去1年差唔多每日都出席疫情簡報會,反觀衞生防護中心總監黃加慶喺期間休假超過1個月喎。Priscilla質問衞生署有冇檢討人員工作分配,又要求提供衞生署署長陳漢儀、黃加慶同張竹君喺過去一年出席記者會嘅次數。
之但係陳肇始喺書面答覆中仍然「耍太極」,話政府會透過記者會,向公眾發放疫情資訊,喺去年總共舉行咗超過300場記者會。又講到衞生署係應對疫情嘅主要部門,會因應運作需要,適時調配人手,仲強調同事各有分工咁話喎。Priscilla當然唔滿意回覆喇,喺社交網站大吐苦水,話「乜真係咁難答咩?」質疑自己到底「睇咗啲乜嘢」。Priscilla向我哋鬧爆陳肇始,話局長並無正面回答人手安排問題,顯示佢並唔了解現時嘅運作,但「冤有頭、債有主」,理應要交代清楚喎。
Priscilla前排去咗內地,親身經歷咗14日嘅隔離措施,形容內地將疫情視為打仗,既重視、又謹慎,每日都有人打電話悉心問候佢嘅身體情況,更加凸顯香港抗疫團隊好死板,甚至不負責任啊!Priscilla批評政府始終唔肯落實全民強制檢測計劃;檢測方法成效存疑,有病人原本獲得結果證明並無確診,病逝竟然發現實情係確診;對緊密接觸者「三不問、三不管」,有人「白等、等到死」。總之就問題一籮籮,直指依家講緊人命問題,好多人都係無辜病逝,促請當局好快啲反思喇!