政Whats噏:又有政府高官倒米 林偉喬自爆屋企人唔用銅芯口罩
20210114
東網電視
更多新聞短片
林偉喬話自己用緊5個銅芯抗疫口罩,有部分為屋企人轉贈。
政府上年斥資2億港元全民派發銅芯抗疫口罩,不過就劣評如潮,唔止得唔到市民支持,就連政府高官都倒米。今次就輪到政府資訊科技總監林偉喬(Victor)喇,佢就自爆屋企人冇用到啲口罩。銅芯口罩係由創新及科技局出品,不過作為轄下嘅部門都唔撐場,唔知局長薛永恒又點睇呢。
Victor今日(14日)出席網上論壇,期間就自爆話屋企人冇用到銅芯口罩,所以有部分就畀佢拎咗嚟帶,埋單計數仲有成5個咁多添。按每個口罩可以洗約60次嚟計算,如果佢一日洗一次,依家所積埋嘅口罩都可以用起碼9個月添。佢仲話,新冠肺炎疫情帶畀政府唔少啟發,呢一年推行唔少項目,有部分自己都親身感受過,好似係疫情儀表版咁,可以透過地圖形式容易得知疫情進展同高危地方。
話時話,當時本身推出銅芯口罩係用嚟解決口罩荒,但推出之後其外觀同安全問題備受非議,兩輪派發計劃只係派出大約1,078萬個口罩,喺街頭上已經唔多市民戴,仲要唔可以喺醫院使用,連應考政府聯合招聘考試(JRE)都唔戴得入場。家陣Victor屋企人都唔用,連屋企人都Sell(推銷)唔到,難怪市民都唔用啦!