立法會房屋事務委員會今早(14日)用Zoom舉行視像會議，多名議員畀人捉到疑似喺車內開會，其中工聯會議員郭偉強雖以立法會為虛擬背景，但期間卻出現疑似倒後鏡、平安符及車頭掛口罩，更出現佢扭軚嘅畫面，睇嚟佢喺開會期間揸車喎！其後郭喺社交平台話，已盡快喺適當位置停車繼續會議。

郭偉強喺會議期間冇戴口罩，直到尾聲佢提出動議，但法定人數不足。跟住畫面見到郭嘅頭前後晃動，委員會主席張宇人話仲有幾分鐘就要投票，「但郭偉強成個人都唔見咗，淨係見到你隻左耳，成個人都見唔到，一陣唔知你點舉手」，郭就尷尬咁笑幾聲。當時畫面就驚現有疑似倒後鏡、平安符等物件，仲有口罩「吊吊揈」添！點知後來仲見到郭扭軚嘅畫面！

面對多方質疑，郭偉強其後喺社交平台發文話天氣寒冷，車上暖氣係佢嘅「避寒中心」，已盡快喺適當位置停車繼續會議，仲呼籲大家要注意路上安全。受到網民「圍插」，郭偉強就自嘲、死撐，話喺泛民主派「攬炒十步曲」斷纜，士氣低到極點嘅時候，可以畀機會大家「圍爐自high」，都算係以德報怨咁話喎。

其實，議員柯創盛同劉國勳都喺車上開Zoom喎。柯創盛回應話，會議上表達完意見後有事要離開，之後收到秘書處通知話會議投票人數不足，就即刻喺車上開Zoom進行投票，但強調當時坐喺副駕駛座位上，亦有扣好安全帶㗎。據悉，有建制派「高層」知道之後，認為事件好離譜，覺得會引起公眾觀感問題，仲話會再次敦促議員開會嘅時候要坐定定，唔好周圍去呀！

根據《道路交通條例》第38條，任何人駕駛車輛時，若無適當謹慎及專注，或者未有合理顧及其他道路使用者，即屬不小心駕駛，最高可被判處監禁6個月㗎。警方回覆查詢時指，根據《道路交通條例》，駕駛人士必須時刻留意路面情況，小心駕駛，保障行人安全，提醒切勿以身試法；又指市民發現違法行為應該記低時間、地點、車牌等向警方舉報。