政Whats噏：楊潤雄鼓勵年輕人學習歷史　點知拋書包甩轆

政府成日話非常重視教育工作，希望培養新一代嘅人才。教育局局長楊潤雄認為，歷史係不可或缺嘅一環，鼓勵年輕人多學歷史，但佢喺引經據典嘅時候，突然接唔落去，要人出言提醒。

楊潤雄今日(15日)出席一個新歷史節目嘅啟動禮，主持人問到點解要學習歷史，楊潤雄興致勃勃，一嚟就拋書包，想引述唐太宗話「以銅為鏡，可以正衣冠，以史為鏡，可以知興替，以人為鏡，可以明得失」，點知講到「以人為鏡，可以...」，就「er」咗好耐，要靠主持人出言提醒後面嗰句。

之後，楊潤雄繼續發表偉論，話年輕人充滿熱誠同創意，有心服務社會，但好多時缺乏社會經歷同人生經驗，透過學習歷史就可以吸收前人智慧，更好咁計劃未來，令未來發展走上正確方向。

楊潤雄又話，相信大家都希望培育年輕人成為具國家觀念、香港情懷、世界視野嘅一代，作為中國人，必須認識中國歷史。但唔知佢係咪都需要進修一下歷史呢？