政Whats噏：黃大仙區會4項撥款連環碰壁　議員：龍門任佢擺

17區區議會由泛民主派主導後，同政府嘅關係愈趨惡劣。黃大仙民政事務處引述區議會撥款守則，一連拒批4項撥款。當區區議員鬧爆政府封殺區議會，又話處方已經自行為守則釋法。

黃大仙區議員早前提交多項撥款申請建議，區議員劉珈汶今日(15日)喺社交網站發布當區民政事務專員黃智華嘅回信，佢一連拒批4項撥款申請，包括研究交通噪音問題、電單車泊位需求、非公屋防疫設施計劃同埋區議會宣傳及推廣事宜，總共涉款176萬港元。

其中一個拒批理由係引述區議會撥款守則，話較適宜以其他政府撥款或部門撥款進行嘅活動，一般唔會獲得支持。劉珈汶批評政府正展示「龍門任佢擺」，話黃智華係自行為守則釋法，以後守則會變成「萬能Key」，只要有其他政府部門存在，區議員就乜都唔使做喇。

東網向民政事務總署查詢，點樣決定由區議會抑或係其他部門進行撥款項目，有關方面回覆，上述提及嘅交通噪音同電單車停泊位研究，分別屬於環境局及運輸及房屋局嘅政策範疇，署方根據善用公帑嘅原則，唔會協助區議會撥款推行有關計劃。