政Whats噏：區議員舉報郭偉強　林卓廷抽水反被轟犯案纍纍

工聯會議員郭偉強日前一邊揸車，一邊透過流動應用程式，隔空參與立法會房屋事務委員會所召開嘅視像會議。後來郭被各方「圍插」之後，尋日(14日)向公眾認衰道歉，深夜由黨友陪同之下去警署自首，雖暫時未遭檢控，但就成為政敵嘅「抽水」對象。例如前議員陳志全同林卓廷就藉今次機會，爭相批評郭嘅行為，但有網民反指佢哋五十步笑百步喎。另外，仲有區議員去信警方要求徹查郭嘅事件添。

舊年5月，前議員陳志全(慢必)喺立法會內務委員會被郭偉強扯跌，案件因律政司介入而撤控。好多人關注慢必會唔會向警方舉報郭偉強揸車開會嘅事，佢喺短片批評郭原本諗住「側側膊、唔多覺」，但後來發現「衰硬」，先肯致歉兼自首。慢必又話立法會開會好嚴肅，一係郭就唔好出現，但又要提出動議，衰就衰在「扮投入」。慢必又話，知道大家覺得郭係佢嘅「仇家」，但佢唔會報警，又認為警方同律政司都唔會作出調查，亦怕且建制派唔會驚有關行為導致失票，就算打橫嚟都可以照樣當選喎。

至於前議員林卓廷，同樣拍片評論事件，仲模仿郭將口罩掛喺車廂嘅畫面，專登喺鏡頭前掛個口罩，仲問邊個擺得有藝術感多啲。講講吓，個口罩郁得太勁，林話「個口罩唔好飛嚟飛去先，騷擾我做直播」。建制派話喺泛民主派總辭之後，可以更好咁監察政府，林就揶揄原來建制派係揸住車監察政府嘅。但都有網民對兩人言論唔太受落，反問慢必之前多次破壞立法會秩序，又有無自首呢？仲有人批評林卓廷自身犯案纍纍，仲話番人轉頭，真係五十步笑百步喇。

仲有民主黨嘅深水埗區議員袁海文都唔收貨，仲引述工聯會議員麥美娟嘅言論，曾經稱呼袁為「報警之王」，袁就要對得住個稱號，話已經去信警務處處長，要求警方嚴正處理事件，同時希望郭偉強可以認真配合調查咁話。不過警方至今都無回應係咪收到袁海文嘅舉報信函，只係重複話已經就一宗事主主動投案嘅交通事件，交由港島總區交通部跟進調查。雖則郭偉強已經認衰道歉，仲要去自首，但睇嚟一時三刻都無咁容易平息事件喇。