政Whats噏：段崇智對保安受襲感震驚　若事件涉中大成員更會痛心

香港中文大學早前有黑衣人到場搗亂，保安員上前制止嘅時候被潑灑不明白色粉末。中大校長段崇智今晚(16日)喺網上發布影片，對有保安受襲感到震驚同不安，話施襲者嘅行為唔可以用表達訴求或者個人立場作藉口，如果涉及中大成員，佢仲會覺得痛心同失望。

段崇智話大學係一個追求知識嘅地方，任何人有不同意見都應該保持理性。佢又批評黑衣人嘅行為係純粹破壞，威脅校內人士安全，後果好嚴重。佢強調，大學有責任保護每一個人，包括職員、學生同埋訪客嘅安全，授權保安人員執行措施都係想所有人可以喺校園內安心學習同工作。

另外，佢話事件發生後大學已經即時檢討，同時安排加強保安措施，又指每次校園發生事故，佢都會即刻了解詳情同埋商討善後工作，呼籲市民畀校園成為追求真理知識嘅理想之地咁話喎。