政Whats噏：新公務員工會解散　議員追問資金流向

對於公務員事務局日前發通告，要求所有公務員喺4星期內簽署聲明擁護《基本法》及效忠香港特區，喺前年反修例風波期間成立嘅「新公務員工會」尋日（16日）宣布解散，因為預計所有理事均有可能無法繼續留喺政府，變相失去工會會員資格，理事會可能將人數不足故決定解散工會。不過呢1年幾以嚟嘅會費又點算呢？唔少議員都關注會費嘅去向。議員陸頌雄就直指為政治而搞工會始終唔會長久，又指賬目應該要透明同公開。

對於新公務員工會解散，陸頌雄就話不如大家估下工會收咗幾百萬嘅會費，以及早前籌款得來嘅錢會如何處理？而議員張國鈞都質疑工會收晒會費，然後「一句唔該」就解散，咁會員費又會點處理呢？張仲寸工會指，其實理事們辭職公務員，再將個名改做離職公務員工會就得啦，政府都管唔到嘅。

前新公務員工會主席顏武周就解釋，會費會按會章規定，捐贈慈善機構。至於會員資料，顏指稍後會詢問職工會登記局，之後再向會員交代。新公務員工會係上年6月大約有3200名會員，而工會年費為50港元。