政Whats噏:立會水馬未撤走 外圍設花槽防衝擊

20210117
東網電視
更多新聞短片
大樓玻璃與水馬之間假設置大型花盆。(陳嘉順攝)
前年6月爆發反修例風波,期間發生激烈衝突,立法會大樓更被嚴重破壞,政府其後喺各主要建築物周邊擺放水馬,令本港曾出現「水馬圍城」嘅情況。社會氣氛漸趨緩和,唔少地方都搬走咗水馬,但立法會大樓周邊仍繼續擺放水馬之餘,仲要進一步加強大樓內外嘅保安措施喎。
卓妮發現近日立法會大樓周邊加設咗大型花盆,莫非真係為咗望落靚啲?保安事務委員會主席陳克勤就話花盆有美觀效果之餘,其實係臨時保安措施,因為先前有示威者衝擊大樓嘅玻璃幕牆,大型花盆就起到緩衝區嘅作用喇,但依家嘅花盆都唔係最終設計嚟嘅。聽聞大樓外嘅水馬要等大樓全部保安措施完成之後,先至會撤走。
唔單止大樓外加設緩衝區,大樓內部先前加裝閘機後,都繼續加強保安措施。據了解,大樓1樓同2樓、喺近議員入口2的三部電梯前,都會再加裝閘機喎。據悉,喺上述兩個地方安裝閘機嘅建議,係民主派議員總辭前提出嘅,原因係示威者先前衝擊大樓,同埋成日有非議員或議員助理同記者嘅人喺大樓出出入入,閘機可以避免人群聚集。
閘機多到咁,以後喺立法會大樓行兩步就要拍卡,議員唔覺得唔方便咩?有議員就舉例話,之前村屋都係夜不閉戶,直到有人偷嘢先閂門,依家情況一樣,有人衝擊立法會,就算幾唔方便都要為安全着想。
實際上,大樓加裝50部閉路電視後,總共會有約500部閉路電視,確保大樓嘅監視系統唔會再有盲點。另外,大樓嘅保安顧問仲考慮緊會唔會喺議員人口位置增設安檢程序,避免有議員「搞搞震」咁話喎。