政Whats噏:林卓廷賣樓打官司 網民質疑「着草」

2021年01月18日 15:01
東網電視
更多新聞短片
唔少網民質疑林卓廷賣樓係為日後「着草」鋪路。
繼支聯會主席李卓人日前被爆突然賤賣美孚新邨單位後,官司纏身嘅民主黨副主席林卓廷近日亦以逾千萬港元,賣出沙田翠湖花園的自住物業。林解釋,話賣樓主要係要套現用嚟應付子女升學及多宗官司,聲言自己絕對唔會離開香港,賣樓並非準備「走佬」。之不過,呢番說話就好似無咩人信,消息一出,大批網民話佢九成九會「着草」,仲暗寸佢,打官司眾籌咪得囉,使乜賣樓。
根據地產代理資料,林喺沙田翠湖花園3房1102呎連車位單位,最近交易,成交價為1268萬元。佢喺2009年買入,當時係552萬元,即帳面升值716萬元。
林卓廷回應查詢時就話無法想像香港政治寒冬係幾咁漫長,所以要多為家人準備,而未來子女升學都需要一大筆錢,仲計劃將16歲嘅兒子送去外國升學添!佢又話賣樓嘅另一個原因係要應對多宗官司,預計都需要一大筆錢,賣樓之後就會暫時租樓居住,重申自己無計劃離開香港,亦都有多宗官司在身,旅遊證件亦都被扣起,「走佬」係無可能嘅事咁話。
但似乎就無乜人信佢嘅解釋。其中大律師龔靜儀就喺消息傳出後,第一時間喺Facebook發貼,話「你又賣樓、佢又賣樓,跟住又輪到邊個會賣樓?」暗寸最近民主派人士陸續賣樓套現,唔知有何意圖?有網民就實牙實齒,話林一定係「着草」,笑言邊個「走佬」前話畀人知自己「走佬」㗎!仲有人話佢賣咗樓,然後搬入赤柱,可以慳返唔少喎。似係暗示佢之後應該到赤柱監獄坐監嘞!
不但如此,網民仲提醒話呢排要留意下啲碼頭、公海,預料林可能同近日賣樓嘅李卓人坐埋同一條船「走佬」喎,更有人話打官司眾籌咪得囉,使乜賣樓,覺得佢一定會「着草」喇!亦有網民有先見之明,叫各銀行快啲凍結佢戶口。
事實上,林卓廷現時最少身負5宗刑事案件、面對8項控罪,包括上月28日被指涉嫌喺前年12月至去年7月期間,向公眾披露一名接受廉署調查人士嘅身份,被落案控告3項「披露受調查人身份」罪名;被指涉2019年7月21日喺港鐵元朗站大堂,連同其他身份不詳人士參與暴動等。另喺本月初,佢更因為有份參與民主派初選,涉違反《港區國安法》中「顛覆國家政權罪」,被香港警務處國家安全處上門拘捕。
學網民話齋,執法部門真係要多加留意,一唔小心真係畀佢走咗去,你話點算啦!