政Whats噏：邀約商花市　轟食衞局三次甩底　何俊賢促道歉

政府話取消年宵花市，又話安排喺花農喺公屋邨擺檔買花，跟住又話可能搞啲小型花市，真係五時花六時變，一時一樣，唔知想點？立法會漁農界議員何俊賢(高佬賢)今日(18日)喺社交平台爆料，話曾約政府同業界會面傾花市問題，但食物及衞生局竟然三度「甩底」，叫政府盡快解釋同道歉。

高佬賢喺貼文話，事緣喺上周一同政府會面後，已約定喺上周三再度會面，其後卻一再延至上周五。政府延後兩日會面，佢已感到政府取消年宵嘅後續工作上毫無準備，令花農同檔主無所適從，所以再向政府提出重開年宵嘅意見，同日政府又再致電話希望將會議延至今日舉行，佢話已再三包容，點知會面一事至今仍不得要領。

佢話近日再有消息指政府考慮重開年宵，但消息至今仍未能確認，再加上溝通難如登天，已令花農、檔主甚至佢進退維谷，需自謀出路。佢要求政府向公眾公布最終決定，盡快解釋三次延後會議嘅原因同道歉。對於開會無期，佢仲話傳媒唔使打電話問佢乜嘢事，有乜問題應該問政府。

食物環境衞生署發言人回覆東網查詢，話喺防疫抗疫嘅前提下，食環署正積極考慮合適方案以協助花農銷售年花，又話署方會透過分散人流同壓縮規模來減低聚眾風險。但冇解釋點解三次開會都甩底喎。