政Whats噏：禁另類吸煙產品現分歧　 陸頌雄「拉布論」惹黃定光反駁

過去建制派經常鬧爆民主派「拉布」，但泛民近乎絕迹議會後，「拉布」嘅竟然變成建制派？話說喺禁止電子煙同加熱煙問題上建制派意見分歧，今日(19日)審議修訂《吸煙（公眾衞生）條例》嘅法案委員會會議上，支持法案嘅議員陸頌雄不滿審議速度太慢，仲喺發言時提到「疑似拉布」嘅字眼，引嚟該法案委員會主席黃定光（象哥）強烈不滿！

今屆立法會會期原定舊年7月中結束，所有未能趕及會期完結前通過嘅法案都要推倒重來，其中有4條當時仍然喺法案委員會審議階段，包括今次嘅《2019年吸煙（公眾衞生）（修訂）條例草案》；有關法案委員會當時合共舉行咗9次會議，但都需要解散。不過，隨住今屆立法會延任，呢啲法案變相可以喺原有審議程序繼續推展，其中立法會喺復會後就成立另一法案委員會，繼續審議有關禁止另類吸煙產品嘅工作。

陸頌雄今日喺會議上指出，有超過160年歷史嘅傳統香煙難以禁絕，當中涉及歷史問題，強調唔可以畀吸煙問題繼續發展落去，一旦政府按照部分議員所言，只禁止電子煙而容許銷售加熱煙，擔心多年來控煙工作嘅努力，將由此打開缺口，最終返唔到轉頭。對於新嘅法案委員會已經進入第3次會議，陸就話尊重在席議員有唔同意見，但就覺得要有正常嘅審議效率，擔心有市民會覺得依家嘅建制力量用疑似「拉布」手段，強調是否夠票都好，應盡快交上大會繼續審議。

之不過，象哥發言時就反駁，叫陸唔好將審議法案形容做「拉布」手段，強調依家在席嘅都係建制派，議員據理力爭，其發言都有道理。象哥仲同陸講：「唔好將過往嗰種不正當嘅拉布行為加喺我哋法案委員會身上，OK？」

而議員陳健波就認為政府心知肚明，將電子煙同加熱煙一齊禁止，就會得唔到足夠贊成票；相反分階段咁做，即禁止電子煙、規管加熱煙嘅話，就會有足夠支持。另一議員馬逢國亦都話，覺得政府應該要先易後難，反問點解一定要一併處理兩類產品，仲形容目前情況變相係一個依家好興用嘅詞語，笑言政府想「攬炒」喎！