政Whats噏﹕轟網絡充斥假資訊　郭偉強稱《衞報》為世衞報章

網絡流傳嘅消息，往往真假難分，就連疫情亦有好多失實嘅傳言。關注政府抗疫措施嘅工聯會議員郭偉強，就呼籲政府要多加澄清不確嘅資訊，仲引述英國報章《衞報》(The Guardian)嘅文章，但就話《衞報》係世界衞生組織嘅報章。話時話，郭偉強一邊鬧政府唔處理假資訊，但自己又發布錯誤消息，豈不是自打嘴巴？

今日(21日)立法會辯論《施政報告》致謝議案期間，唔少議員都批評政府民生政策、抗疫不力，不過郭偉強一開始發言就話擔心香港瀰漫假新聞同假消息嘅風氣，又指互聯網令謠言傳播速度快得離譜，郭枚舉本港同海外嘅事例，包括英國有謠言指5G基站係抑制體內產生新冠肺炎病毒嘅免疫系統，隨後5G基站遭燒毀、舊年香港嘅普及檢測會由鼻插到喉嚨，令人感到劇痛、前年8月31日香港太子站嘅事件等等。

郭又引述流行病學家庫哈爾斯基（Adam Kucharski）早前喺《衞報》發表嘅文章，指打擊網絡謠言嘅最好方法，應該以對待真正病毒一樣咁對待謠言。之後佢仲話「相信都係世界衞生組織嘅報章」，而事後亦冇人作出糾正。只係議員葉劉淑儀曾提出規程問題，話依家應該係辯論《施政報告》，質疑郭喺發言期間鼓吹立法建議係咪恰當。

對於假新聞嘅問題，郭鬧爆話散播謠言嘅人可能因有着數先主動散播，又指輕信謠言嘅人係因焦慮、恐慌同埋憤怒而喪失理性，形容係後真相時代，人類會因應個人喜好、意願去信納個別嘅資料來源，質疑依啲做法如何令社會安定同埋處理防疫工作。佢仲話依家對待假資訊嘅法例有嚴重不足，且罰則過低咁話。

雖然議員喺立法會發言係有《立法會(權力及特權)法》保障，之不過呢邊廂先至痛斥假新聞，轉個頭自己就講錯嘢。繼早前被踢爆一邊揸車一邊隔空開會違反交通安全，話咁快又再出醜於人前，睇嚟郭偉強喺農曆新年期間應該要去轉下大運喇！