政Whats噏:議員促海洋公園做好發展規劃 勿要政府再填氹

2021年01月22日 10:49
東網電視
更多新聞短片
海洋公園唔積極改革嘅話,好難再問議會攞錢。
連年虧損嘅海洋公園喺舊年5月底獲政府撥出54億港元「救亡」,當時嘅社會輿論普遍不滿,要求海洋公園唔好再到立法會攞錢。點知海洋公園早前公布「重生」方案,政府以支援海洋公園集中教育同保育工作等理由,再次向海洋公園「泵水」。有議員今日(22日)喺立法會發言期間話海洋公園多年來都係赤字營運,一早就應該轉型,以免政府未來要再次向公園注資呀!
海洋公園早前公布「重生」方案嘅內容,係部分園內設施會外判營運,預期暑假開幕嘅水上樂園同保育工作由公園負責,而海洋公園會畀公眾免費入場,但指定設施就逐項收費。政府就話為支援海洋公園集中教育及保育工作、因應公園短時間內轉型所遇到嘅現金短缺,同埋設立新歷險主題區等事項,由22/23年開始嘅4年內每年提供2.8億元補助,合共11.2億港元,另加一筆非經常撥款16.7億港元、以及將還款期延長2059年會令政府減少約40億港元收入,合共涉款約67.9億港元。
「重生」方案好唔好就係未知之數,但旅遊界議員姚思榮今喺立法會就話海洋公園早就應該轉型,近年面對鄰近地區主題公園嘅競爭,加上海洋公園設施老化、門票價格欠缺競爭優勢嘅問題,導致入場人數停滯不前之餘,仲有下降趨勢,搞到連續數年錄得虧損。佢就希望政府同公園管理層作出新嘅定位、規劃同埋總結,為海洋公園制訂未來長遠發展嘅保育路向喇!
姚又強調公園要做好未來發展規劃,千祈唔好又要政府注資,亦都要為2000名員工做好安排,盡量避免裁員,同埋要求外判商優先聘用現有員工。佢又話公園應該喺轉型嘅過渡期採取節流措施,釋除市民疑慮,同時以創新思維及深入社區,推動保育工作咁話。
其實立法會財務委員會喺舊年都通過一筆54億港元嘅撥款,用作資助公園營運1年、償還海洋公園嘅商業貸款,同埋清繳完成海洋公園大樹灣發展項目所需嘅費用。當時唔單止引起社會熱議,就連部分議員都認為畀得一次又有下次。若然海洋公園唔積極改革嘅話,下次係咪要繼續攤大手板,問納稅人攞錢使呢?