政Whats噏：滯英區議員4度被取消機票　被寸遺下當區居民

有區議員滯留英國1個月，4次被取消返港機票，對於盡快回港履行區議員職務可謂心急如焚，批評港府未有交代幾時解封英國航班。但有市民並唔收貨，指摘佢拋低當區居民，不如索性移民喇。

九龍灣麗晶花園早前爆疫，當區區議員畢東尼早前去英國探親，被狠批置居民安危於不顧。畢東尼今日(22日)喺社交網站更新狀況，話原本改至下月13日回港嘅航班，第4度被航空公司取消。而佢就再預訂下月15號嘅機票，希望可以盡快返香港服務大家咁話。

畢東尼話同幾百名滯英港人，每日都焦急咁等待返香港，但苦候只換來機票被再次被取消，覺得好灰心。話會再去信港府同行政會議成員，促請盡快制訂容許滯英港人回港嘅計劃。

不過有網民留言話，政府遺下在英港人，而畢東尼就遺下麗晶人。仲有人叫佢要小心3個月唔開會嘅話，會被取消區議員資格，又叫畢東尼唔返嚟都無所謂，不如索性移民咁話喎。睇怕畢東尼再唔返香港，就會畀人鬧到體無完膚喇。