政Whats噏：陳肇始無掛證件入受限區域被截停　同行官員解圍

政府被炮轟抗力不力，本港疫情持續一年，但疫情不斷反覆，確診個案破萬宗，食物及衞生局局長陳肇始更被鬧爆抗疫慢幾十拍。現時油尖旺一帶淪為「疫區」，陳肇始到「受限區域」視察，竟然無掛上證件就想入「受限區域」，一度被警員截停，需要由其他官員出手「營救」，先獲得放行喎。陳肇始唔止慣常「甩甩漏漏」，今次又甩轆，竟然唔記得戴證，唔通以為自己有特權，可以自出自入？

政府今日(23日)限制喺佐敦指明「受限區域」內嘅人士，需要留喺處所接受強制檢測。雖然似乎有更強硬嘅「新招」應對疫情，但市民一啲都唔收貨，被批公布時間太遲，好多人已經拖篋走佬。

可能陳肇始想挽回些少分數，聯同民政事務局局長徐英偉同衞生署署長陳漢儀，落區視察同交代有關安排。陳肇始、民政事務局局長徐英偉同衞生署署長陳漢儀，戴咗口罩之外，仲戴埋防疫面罩，當時徐英偉首先進入「受限區域」，當隨後嘅陳肇始行入去時，隨即被駐守嘅警署警長截停，原來陳肇始冇戴證件。

當時陳肇始即刻摸下件褸，睇嚟係搵證件，但動作都唔夠其他人快，徐英偉即刻轉身「幫口」，展示自己佩戴嘅證件向警長解釋，話陳肇始係「政府官員，唔該晒」，而行喺陳肇始後面嘅陳漢儀亦有幫口解釋，咁陳肇始先獲得放行。

眾所周知，陳肇始抗疫「甩甩漏漏」，估唔到連進入「受限區域」都唔知規矩要戴證件，定係以為自己貴為局長，可以自出自入，甚至鍾意打橫行都得呢？

其實唔少議員都批評陳肇始喺立法會回應質詢時例牌「背書」，講述疫情嘅最新情況同社交距離措施，早前更被議員批評帶議員遊花園，更有議員鬧佢係「壞咗嘅留聲機」，甚至叫佢提早退休。

實際上，呢排有傳建制派議員話要換局長，即係叫佢落台、換人喇！而佢前日喺電台節目回應有關問題，同時主持人問及有冇能力繼續帶領團隊的抗疫工作，佢當時冇正面回應問題，只係話建制派或會有不同的意見，會繼續聆聽意見並加以改善，未來會盡最大努力帶領食衞局同衞生署前行。