政Whats噏:被追22萬訟費 梁凱晴呻難獨力支撐網上發起眾籌

2021年01月25日 19:34
東網電視
更多新聞短片
梁凱晴決定眾籌訟費。
觀塘區議員梁凱晴上年聯同「東九龍社區關注組成員」鍾健華提出司法覆核,要求暫停造價5,000萬港元嘅觀塘海濱音樂噴泉工程,但因為未能申請法律援助而撤回,上年年底被高等法院追討22萬港元訟費。面對高昂訟費,梁凱晴今晚(25日)於Facebook發文,坦言難以獨力支撐,決定發起眾籌以籌集相關訟費。
梁凱晴話,觀塘區議會上年初通過要求叫停觀塘海濱音樂噴泉工程工作,但政府一直漠視民意,拒絕其他更符合區內醫療及社區需要嘅設施,將半億公帑強推不合市民所用嘅音樂噴泉。所以佢聯同鍾入稟法庭,試圖以司法覆核煞停半億觀塘音樂噴泉,以求彰顯規劃公義喎。
之但係,梁話政府收緊法援令民間團隊難以負擔高昂法律費用,又指民政事務總署、立法會財務委員會主席同埋立法會民政事務委員會主席,罕有地三方面追討訟費,令佢哋需要償還高達22萬元嘅訟費。佢坦言個人難以獨力支撐如此高昂嘅費用,所以經過數周時間、思考唔同嘅應對方法後,都未有合適方法解決,所以就發起眾籌解決。