政Whats噏:政府稱小量罐頭冇拉環 港台報道爭議難平息

20210126
東網電視
更多新聞短片
雖然政府承認限制區域派發嘅罐頭並非全部都附有易拉環,但港台嘅報道仍被指有誤導之嫌。
香港電台上周派員採訪佐敦受限區域時,因報道指政府分發嘅食品包內雖有罐頭但冇罐頭刀,從而引發「罐頭風波」,被質疑有誤導之嫌。雖然港台及後發聲明重申報道屬實,但建制派圈子就連日炮轟港台記者有違專業操守,唔肯承認錯失。雖然政府今日凌晨(26日)就喺Facebook發文話,只有80%罐頭有拉環畀食用者方便打開,但有關港台報道手法嘅爭議聲依然不斷。
港台嘅報道引起咁大爭議,全因相關報道嘅相片只影到罐頭嘅底部,有建制派人士見狀即刻拎該區居民獲發嘅物資嚟做對比,發現居民所得嘅罐頭都有拉環,質疑港台記者係蓄意誤導公眾。加上《南華早報》早前作相關報道後,發現該區區議員提供嘅相片有誤導成分,隨即將報道下架,建制派圈子紛紛將兩者嘅處理手法做比較,批評港台拒絕認錯之餘仲要譴責其他人,質疑其公關處理手法好有問題喎。雖然政府話有兩成罐頭冇拉環設計,但所謂「有圖有真相」,港台今次連圖都冇張,真係好難說服到人喎!
依家「罐頭拉環風波」成為Facebook熱門話題,除咗有網民喺網上上載物件底部相片「抽水」外,警方尋晚都喺Facebook上發文話「有時開唔到罐嘢都唔係一件壞事,無論係唔係有心開唔到,點都好,切勿酒後駕駛」,借今次事件提醒公眾飲咗酒唔好開車啊!