政Whats噏：立法會行管會開位　副秘書長由一變二

立法會行政管理委員會除咗會管理立法會大樓嘅保安、維修、餐廳，仲會決定立法會秘書處嘅結構同埋職能。近日行管會決定將會開設新職位，副秘書長嘅職位將會由一變二，由現任助理秘書長兼任，新嘅副秘書長職位將檢討議會程序同埋運作。

根據立法會文件，行管會通過將會開設多一個副秘書長嘅職位，相關職位將為期12個月。兩個副秘書長嘅職銜就分別為副秘書長(議會及機構事務)同埋副秘書長(發展及資源管理)，將由兩位現任嘅助理秘書長出任，由下月22日生效，但其中一人屆時屬候任性質，等到下月28日先正式生效。

另外，現任副秘書長梁慶儀將於下月28日退任，因此其中一人於下月22日會先以候任副秘書長身份出任。副秘書長(議會及機構事務)主要協助秘書長，就立法會同埋委員會嘅議會程，向立法會主席同埋其他議員提供意見。副秘書長(發展及資源管理)其中一項工作就係負責支援議事規則委員會嘅工作，檢討《議事規則》同埋《內務守則》。