政Whats噏：區議員不斷收性騷擾訊息　網上公開內容拒沉默

本港性騷擾問題日趨嚴峻，更加有區議員深受其害，忍唔住要發表公開聲明，揚言呢啲行為係唔會嚇怕佢㗎！

東區區議員陳寶琼(Kelly)今日(26日)喺社交網站發布打晒格仔嘅淫褻照片！唔通係畀黑客入侵户口？驚唔驚嚇親一班街坊啊。原來佢上載嘅係嚟自一位陌生人嘅騷擾訊息，除咗一張淫褻照片，發送人仲話「我是趙生，我愛你，今晚同你去酒店玩」，仲要好大膽咁開價添。

原來Kelly唔係第一次經歷呢啲情況，話上任1年幾，間唔中都會收到來歷不明嘅性騷擾訊息，都會即刻封鎖對方處理。但事情一而再、再而三咁發生，Kelly忍唔住發公開聲明，強調自己唔會容忍任何形式嘅性騷擾，唔會沉默，更加唔會退縮，直指咁樣係唔會令佢嚇怕㗎。

網民都留言支持Kelly公開事件，仲提醒佢要注意人生安全。仲有網民留意到嗰位匿名人士打錯咗Kelly中文名嘅「琼」字，變咗做「凉」字，忍唔住要恥笑一番。