政Whats噏：科研資助範疇過闊　議員質疑成效有限

發展科研一直都係全球趨勢，政府喺2020年《施政報告》中宣布推出「傑出創科學人計劃」，資助本港八所大學聘任國際知名嘅創科學者及其團隊來港任職時，可以提供更具競爭力嘅條件。資助科研係好，不過有議員今日(26日)就喺立法會工商事務委員會，質疑招聘人才上無針對香港有需要嘅特定範疇，形容只係好似派錢咁，成效未必咁大。

議員蔣麗芸喺會上問政府代表，究竟香港欠缺邊方面嘅人才，先至會透過資助羅致海外人才？政府係資助招聘上有無特定尋找某一啲學科或者研究題目嘅人才？創新及科技局局長薛永恒回應話，是次招聘嘅科研人才範疇都好廣泛。蔣就批評，政府方向過於廣泛，講白啲咪即係無目標囉。蔣舉例，就好似香港嘅5G上網科技未算普及，咁政府就應該搵返相應嘅科技人才。蔣形容政府不具針對性嘅計劃就等於派錢，又話自己好憎呢啲派錢，但又無成果嘅方案。

薛永恒就解釋，是次計劃嘅成效，主要以學者來港後嘅科研發展，以及其成品或專利來量度。當初評審委員會評核學者嘅資歷，以及所研究範疇嘅發展潛在影響力，例如香港現時需要嘅樂齡科技咁，先再決定批唔批出資助。

不過薛指出，大學科研範疇廣泛，唔同嘅學科都非常優秀，有一啲學科目前潛在影響力雖然有限，但唔排除將來都會對社會有好大嘅影響力，所以計劃希望可以包攬多啲唔同嘅範疇，包括健康科學同埋工程學，強化大學基礎科研，再將研究成果轉化為應用到嘅科技。

另外，亦有唔少議員關注政府嘅評審委員會組成，議員鍾國斌就質疑評審委員會嘅人士，係咪真係具備唔同科研嘅知識。薛表示，評審委員會係獨立組成嘅，包括學術界、科技界、專業人士同埋政府代表。雖然無可能涵蓋全部科技類別，但委員會將會有秘書處支持，因應唔同申請，而聽取不同界別人士嘅意見，大學亦會就希望招聘嘅學者向評審委員會提供資料。

由於計劃將喺5年內提供最多共100個名額，除咗招聘資深學者，獲選嘅學者團隊嘅研究員亦會獲得最多3年嘅資助，協助該學者進行研究，計劃估計將動用20億元，條數都唔細架。議員黃定光就關注當科研向市場轉化，當中嘅知識產權係屬於邊個嘅呢？創新及科技局常任秘書長蔡淑嫻就話，會畀返大學決定知識產權分配。黃定光就建議政府應該考慮有所收益，因為呢一筆資助都係公共資源嚟架嘛。