政Whats噏：政府明起恢復部分公共服務　部分區議會獲通知可復會

因新冠肺炎疫情關係，政府上年12月起實施特別返工安排，民政事務總署亦要求區議會暫停或取消會議，區議會喺冇場地及秘書服務嘅情況下一直要自己搵場地開會。不過政府尋日(27日)宣布聽日起恢復部分基本公共服務後，有部分區議會近日已收到通知，指區議會大會及委員會會議聽日(28日)起可恢復正常，而秘書處亦會重新提供服務。

葵青區議會主席單仲偕話，一直有同該區民政事務專員保持聯繫，希望知道幾時可以重開會議。佢尋晚就收到通知，話聽日起可以如常舉行會議，而秘書處亦表明會提供全面支援，相信今次恢復會議係同公務員最新工作安排有關。

佢又話獲通知可以一星期召開兩次會議，但就唔清楚全面恢復會議嘅細節。佢仲話早幾日返到區議會辦公室時，已經見到有職員喺會議室嘅座位間加裝透明膠板。

大埔區議會轄下嘅行政及財務管理委員會主席胡耀昌就話，突然收到通知指會議可以重開，而秘書處亦有詢問佢哋有咩會議急住召開，稱可以先作安排。佢話因為疫情關係唔少活動都搞唔成，所以較少團體提交撥款申請，相信該委員會唔會太趕住召開會議。之但係部分地區工程匯報就因為會議暫停而長期被積壓，所以應該會先安排相關委員會舉行會議。

民政事務總署就話，區議會秘書處由聽日起，為區議會會議提供支援，惟基於公眾健康及安全理由，民政事務總署已就每星期召開會議嘅次數向區議會出建議。而各區民政事務處亦會因應其開會嘅地點及場地作出適切嘅防疫措施。