政Whats噏:斥秘書處批津貼慢 區議員被反指文件唔齊

20210128
東網電視
更多新聞短片
楊哲安(左二)同葉錦龍(右一)喺休息期間爆罵戰。(陳芷晴攝)
區議員同秘書處再爆罵戰。中西區區議會今日(28日)召開財務委員會會議,有區議員指該區民政事務處扣起或拖延議員辦事處津貼,大鬧秘書處一啲嘢都做唔到,?契弟咁?民政處畀錢咁,但都拎唔返啲錢。而秘書處就話,有時區議員提交嘅文件唔齊全、報銷嘅款項唔合規格,但已經盡快解決㗎喇!就因為填錯表嘅問題,又掀起議員之間另一場罵戰。
區議員葉錦龍喺會議上,話部分津貼拖咗幾個月都未收到,質疑民政處扣起津貼,話其他區都有問題。而另一區議員甘乃威話,好多新嘅區議員唔清楚細則而冇跟規矩報銷,舉例話自己做咗廿幾年區議員都唔識填報銷帳單,仲指摘秘書處對津貼有更多嘅政治審查先搞到耐咗喎。
而秘書處就話明白區議員緊張錢,但就話部分區議員冇交齊文件,如有困難不妨聯絡秘書處解決。秘書仲話非常樂意解答區議員嘅問題,但話其實網上有報銷指引,同埋已經盡量幫緊區議員拎津貼。
但點知去到會議結束,罵戰都未完喎!區內唯一建制派區議員楊哲安同葉錦龍繼續就辦事處津貼問題對罵,楊話葉填錯表格仲喺到話人,抵佢攞唔返!葉就話楊有錢,反問楊係咪每日帶廿萬返工呀?最後都係要甘乃威行出嚟勸交,拉走咗葉先至告一段落呀!