政Whats噏:灣仔區議會欲設觀察員 謝偉俊轟楊雪盈動議兒戲

20210128
東網電視
更多新聞短片
灣仔區議會今日召開大會,議員就是否增設特邀觀察員爭持不下。
灣仔區議會原本於今個月12日嘅會議因為人數不足而流會,今日(28日)終於夠人開會喇。不過議員竟就住要唔要增設特邀觀察員爭持不下,認為書面動議唔清晰,未有為挑選觀察員訂下明確標準,區議員謝偉俊仲鬧提出動議嘅區議會主席楊雪盈非常兒戲,形容如果有個觀察員係負責觀察灣仔區議會會議嘅話一早唔合格,啲規矩都亂嚟嘅!
多名議員都對動議的內容有好多疑問,包括如何定義具相關專業背景嘅人士、如何招募觀察員、以及民政事務處又會否協助發放津貼等。區議員李碧儀批評動議流於表面,無徵募準則可言,擔心會出現益自己友嘅情況,又指民主派議員去年上任初期先話由於增選委員並非民選,所以取消增選委員,咁依家又要搞個觀察員出嚟,又係咪自相矛盾呢?
謝偉俊反駁稱區議會有新作風係好事,但希望有返啲原則,應該先喺委員會傾好啲細節先,而唔係貪快乜都擺上大會傾。謝形容如果有觀察員觀察灣仔區議會,一定會評為唔合格,批評楊身為區議會主席,動議仍未成熟就擺上大會傾,實在非常兒戲!
同樣地,政府代表對動議都感到一頭霧水。灣仔民政事務專員陳天柱指,動議上有好多唔清晰嘅地方,民政處難以作出一個說法。陳質疑觀察員給予意見後的影響力,以一個粵曲活動為例,若果觀察員認為某一種唱腔比較好聽,係咪以後啲活動都主力用嗰一種唱腔?可能市民反而覺得另一種唱腔好聽啲架,咁又有冇上訴機制呢?最後,表決出現5票贊成、5票反對及1票棄權,由於動議需絕對多數嘅議員支持先可獲得通過,故動議未獲得通過。
另外,區議會亦有動議區議會舉行視像會議的安排,希望能適用於不涉及撥款的會議上,政府代表亦要線上露面出席,多名議員表達支持,認為疫情無了期地持續,不希望重要民生議題被耽誤。動議最後以9票贊成獲得通過,惟陳天柱表示,民政事務總署表示仍未能支援區議會進行視像會議,但稱會如實向總署反映議員的意見。