政Whats噏:林卓廷贊同區議員要宣誓 葛珮帆質疑為「糧支」

20210130
東網電視
更多新聞短片
就林卓廷贊同區議員宣誓一事,葛珮帆質疑佢玩語言藝術。
最近嘅政壇熱話就緊係區議員宣誓一事啦,事關今屆區議會由民主派議員主導,假如要求佢地宣誓,唔知一向同政府唔咬弦嘅佢地又會有咩搞作呢。雖然依家未有定案,但北區區議員、前立法會議員林卓廷早前就話,如果宣誓內容同立法會誓詞一樣,睇唔到點解唔宣誓。此話一出,議員葛珮帆(EQ)就質疑林只係着眼於區議員嘅「糧支」,而大玩語言藝術!
林卓廷最近出席網台節目時,就話依家未知宣誓內容,但如果係同立法會議員宣誓條文相同嘅話,睇唔到所屬嘅民主黨點解唔參與宣誓。佢仲覺得,重點唔係宣唔宣誓,而係政府事後會用咩藉口,去指摘區議員宣誓唔真誠。民主黨本身都有成近90位區議員,林卓廷就認為,如果政府要取消區議員資格,該黨都冇乜嘢應對措施,仲覺得即使打官司都冇用添。
林卓廷竟然贊同區議員要宣誓!大家聽到嚇一嚇。其中EQ今(30日)就喺Facebook貼文,話林嗰句「睇唔到點解唔宣誓」係雙重否定句,認為林係扮哂嘢,根本係玩緊言語藝術。EQ又質疑佢其實係想繼續留住區議員嘅薪津,仲建議不如直接認咗去,咁就唔使咁辛苦,要用言語藝術去回應事件喇!
EQ仲話,民主派呢啲小動作都唔係第一日,早前佢哋喺決定是否延任立法會議員一年問題上,就話要做民調,之後又三番四次「搬龍門」,降低去留門檻,其實咩都任佢哋講啦,不過依家咁講,到時未必係咁做,出爾反爾係常態,大家認真就輸了。意思係叫大家聽住先,真唔真就拭目而待。
其實林卓廷現時身負最少5宗刑事案件、面對8項控罪,早前就以逾千萬港元,賣出沙田翠湖花園嘅自住物業,話要應付子女升學及多宗官司。未來要使咁多錢,可能連賣樓都搞唔掂,想留住區議員薪津都唔出奇嘅。
但話時話,林近日亦因參與民主派初選而涉違反《港區國安法》「顛覆國家政權罪」被捕,即使佢選擇宣誓,都唔知最終會唔會因為參加初選,連區議員資格都冇埋。到時都唔由得咁揀喇!