政Whats噏：「智方便」升級安排擾民　議員斥政府無考慮用家角度

政府早前推出「智方便」一站式個人服務平台，市民可用智能手機登入或使用網上服務，包括填寫電子表格。金融界議員陳振英作為用戶之一，就唔多滿意喎。佢今日(4日)喺立法會話「智方便」若要升級為「智方便+」，同埋啟動數碼簽署，要親身前往郵局，但疫情下郵局提早閂門，好多市民去郵局處理唔同事務，搞到郵局經常大排長龍，搞到市民好唔方便咁話呀。

唔知陳振英係咪覺得太唔方便，直截了當咁話政府安排好差！佢又話早前政府揚言要將香港打造為智慧城市，而當申請銀行戶口都可以喺網上搞掂嘅時候，政府推出嘅「智方便+」，用家登記需要兩步驟，兼且唔可以喺網上做喎，佢就擔心市民覺得「智方便」唔夠方便，而少人使用喇。佢就呼籲政府將數碼簽署功能優化，同埋諗諗係咪可以網上完成登記，強調要為市民着想呀。

對於陳嘅質疑，政府就話數碼簽署係有法定要求，相對嚴謹所以需面對面進行。然後繼續硬銷，指一次面對面登記，以後就安枕無憂喇。對於登記地點少，政府話本身已經有百多間郵局可以核對市民身份喇，只不過又戴返頭盔話，未來日子會增設核對站，構思喺疫苗接種中心設立站位，畀市民接種疫苗後嘅等待時間內，可順便登記「智方便+」。諗得幾好嘅，但政府有乜嘢把握令市民接種疫苗呢？

對於政府決定會改善「智方便+」嘅登記，陳振英話政府服務好多時並冇考慮市民作為用家嘅體驗，希望政策創新統籌辦事處可以設立政府服務體驗調查員一職，試用並改善政府服務，先至好畀市民使用。政府就話建議好好，但創新及科技局轄下已經設有方便營商嘅委員會。唔知政府咁答，係咪會考慮設立呢？

其實創科局甩漏都唔少，港府去年斥資8億，兩度向全民派發「銅芯抗疫口罩」，但屢被批評質素不佳，安全效能成疑，外形又似內衣褲；安心出行流動應用程式又被市民批評冇乜用，下載量低。睇嚟創科局局長薛永恒都真係要考慮點樣提供優質、創新嘅服務畀市民喇。