政Whats噏：情人節去邊度　議員新推介信得過？

好快就到情人節，如果嫌喺街上會人山人海，議員就幫大家物色新去處。乜嘢地方？信唔信得過？

港鐵東鐵線今個星期六(6日)起採用新信號系統，亦會開始更換原本嘅12卡列車，改為9卡列車。議員近日先睹為快，參觀新列車，其中一個矚目點就係二人座位喇！議員容海恩(Eunice)大讚好得意，講笑係情侶專屬，仲問港鐵職員喺情人節，會唔會將鮮花放喺二人座，增添節日氣氛。職員都好配合，話建議男士自備鮮花，情人節當日約定大家一齊試坐。唔知Eunice又會唔會同老公喺情人節試搭呢？

同場仲有議員陸頌雄(Michael)，佢同意二人座啱晒情侶拍拖，之不過就擔心如果身邊嘅係陌生人，就略嫌太窄同埋尷尬。Michael亦提到列車由12卡變成9卡，好多市民都憂慮令載客量大減，佢引述港鐵「拍心口」話，新信號系統可以令班次更頻密，彌補減少嘅載客量，Michael話會密切留意情況，睇嚟都冇咁容易放過港鐵喇！