政Whats噏:容海恩誕女後減近50磅 相隔5年再着旗袍賀情人節 

2021年02月14日 13:39
東網電視
更多新聞短片
唔少網民見到Eunice嘅旗袍照,大讚佢好靚女啊!
適逢年初三兼情人節,議員容海恩(Eunice)今日(14日)就喺Facebook上載咗一張相片充滿新春節日氣氛嘅相片,祝大家情人節快樂啊。相中嘅Eunice身穿紅色旗袍,企喺一棵桃花樹旁,唔少網民大讚佢好靚女啊!之但係,上年誕第2胎嘅Eunice雖然已經減咗近50磅,但就似乎唔係好滿意自己身材,笑言自己「仲有啲肚腩仔」,要繼續修身喎。
已經係兩個囡囡媽咪嘅Eunice話,對上一次着起呢件旗袍已經係2016年,自從前年同上年生咗囡囡後,完全唔敢拎返件旗袍出嚟。佢話上年體重最高峰時期曾增加至170磅,經過1年時間依家終於瘦返去120幾磅。被問到有咩修身秘訣時,佢就話平時工作比較忙,較多時間要落區,自己都好少做運動,但生完二女後飲食回恢復清淡,食少咗甜品同雪糕,仲話夜晚要盡量食返少啲飯喎。
該貼文唔單止得到一班網民大讚靚女外,原來佢老公袁彌昌(Derek)都有份讚好喎!Eunice話上載貼文後第一時間就問佢like(讚好)咗未,又話對方見到張相都話「Okay,都接受到」,笑指今日係情人節,Derek對張相梗係要講滿意,唔敢搵嘢刺激佢喇。之但係,農曆新年期間同家人聚會的話,都難免會食多咗嘢,Eunice就話聽日開始已經排滿工作,難得過新年,當然要趁假期陪家人食多啲嘢咁話。