政Whats噏:建制派「小花」植潔鈴退出政壇 轉行投考督察

2021年02月15日 16:40
東網電視
更多新聞短片
消息指植潔鈴近1、2個月正式退出政圈,並轉行投考督察。
往年每逢大年初四,唔少議員同區議員都會開爐落區同市民拜年,但之前做咗年幾東區區議員嘅建制派「小花」植潔鈴最近好少現身,有知情人士向東網透露,植喺近1、2個月已正式退出政圈,並轉行投考督察,而且早喺舊年已經萌生呢個念頭,據悉植都好適應依家離開政界嘅生活。
有消息話佢入咗學堂,東網向知情人士打聽係咪屬實,佢就話「唔太方便答」,但就證實植的確去咗考督察,仲面咗試添!被問到植幾時退出政圈時,知情人士就話都係呢1、2個月嘅事,佢仲透露植一直都對紀律部隊嘅工作有興趣,而植萌生棄政轉投紀律部隊嘅念頭就由舊年開始有。
問到係咪喺2019年區議會選舉敗陣後先咁諗時,知情人士就話「梗係啦,做緊(區議員)嗰時都冇時間諗啦」。至於另一知情者就話,知道佢需要搞退黨手續,但依家程序去度邊就唔太清楚啦,不過佢都相信植之後都會繼續係一個服務社會嘅人嚟嘅。東網亦有致電同發短訊向植查詢現況,暫時未有回覆。