政Whats噏﹕政府發稿稱安心出行「無大台」　議員斥為黑暴宣傳

政府一直力推「安心出行」流動應用程式，期望可以有效追尋確診者嘅密切接觸者，但有市民始終擔心會構成私隱風險。政府今日發新聞稿形容應用程式「無大台」，出行紀錄只會存放喺用戶手機，但有議員批評政府用詞懶親民，實質就欠缺政治思維啊。

政府資訊科技總監辦公室今日（16日）發稿，強調應用程式毋須用戶登記，係「無大台」，即時惹起網上熱議。雖則政府係講緊出行紀錄只會存放喺用戶手機，個人行蹤唔會外洩，絕對唔會構成私隱風險，但係「無大台」係喺反修例風波中嘅常用詞語，仲被網民恥笑政府沿用呢個詞語，反問官方新聞稿點可以用呢啲詞義不清嘅用語呢？

議員陳恒鑌(Ben)直斥政府自以為親民，但沿用黑暴示威者嘅措詞簡直就有問題，甚至係長他人志氣，滅自己威風，反指無理由幫黑暴宣傳㗎，真係有欠政治觸覺同敏感度。Ben又話撇除政治角度睇件事，無啦啦用「無大台」形容應用程式都好難明，簡單直白咁同市民講唔會收集個人資料咪得囉！