政Whats噏：周庭稱獄中精神及身體都吃不消　預告6月出冊

前香港眾志成員周庭早前承認喺2019年6月21日參與及煽惑包圍灣仔警察總部嘅未經批准集結，被判監10個月。舊年12月初申請保釋等候判刑上訴被拒，要到大欖女懲教所服刑。佢今晚(16日)喺社交平台聲稱，喺懲教所無論精神同身體狀況都吃不消。

周庭嘅社交網站平台今晚再有更新，原來係有朋友喺農曆新年期間探訪佢，同佢拜年。根據轉述，周庭講起喺懲教所都係睇書、聽電台，仲期待收信嚟解悶。周庭又話自己嘅精神以及身體狀況都吃不消，仲努力適應緊入面嘅生活。又透露預計6月可以出冊，期望會有休息嘅空間，休養身體喎。

原本周庭被囚於羅湖懲教所，但南區區議員袁嘉蔚喺上年12月探訪佢，仲喺社交平台交代佢嘅狀況，周庭幾日之後就被懲教署「升級」為甲類犯人，被安排轉倉去大欖女懲教所服刑。有說係由於周庭入獄後，仍然不斷透過探訪渠道宣傳獄內生活，延續對外界的影響力。呢次喺社交平台又再交代佢獄中嘅情況，唔知係幫佢定累佢呢？