政Whats噏：立會盈餘較上年度多800萬　疫下開會少慳電慳紙

話咁快下個月又到財政年度嘅尾聲，據立法會秘書處今日(22日)發出嘅「立法會行政管理委員會2019至20年度事務報告」顯示，立會用剩2830萬港元，較上一個年度嘅2030萬港元多咗800萬港元盈餘。雖然睇落唔算好多，但至少叫收支平衡，相比起政府盤數嚟講算係咁啦。

報告入面話喺2019至2020年度，行管會獲批撥款淨額9.52億港元，其中2.73億港元用咗嚟出議員嘅酬金同開支償還款額；另外6.78億港元就用嚟出糧畀秘書處職員同一般開支，年度內嘅盈餘有2830萬港元。

另一方面，喺2019年7月至10月立法會大樓進行了3個幾月復修工程同喺2020年1月後爆發新冠肺炎疫情期間，大樓數度暫停舉行會議同提供公眾服務，加上行管會一直推行活動同運作要符合環保原則，所以令佢嘅用電量同用紙量都有減少，分別按年慳咗2.63%及26.38%嘅電同紙呀！