政Whats噏:未能提供科學數據 議員斥政府擬禁加熱煙憑感覺

2021年02月23日 22:28
東網電視
更多新聞短片
政府擬立法禁售另類煙草產品,不過議員就批評相關條例草條欠科學數據支持。
旨在禁止另類煙草產品嘅《2019年吸煙(公眾衞生)(修訂)條例草案》一直爭議不斷,負責審議相關草案嘅委員會今日(23日)召開會議,有議員直斥食物及衞生局未能提供科學數據支持禁止加熱煙,話議員好難憑感覺支持草案通過;而局方官員就反駁話,唔可以等加熱煙大行其道先採取行動,政府唔可以擁抱加熱煙。另有議員就話午餐肉都致癌,不如禁埋啦!官員就冇回應,不過話會將議員意見反映畀局長陳肇始考慮。
話說委員會喺兩年間已經舉行9次會議,但至今仍未有共識。議員劉國勳喺會上就質問局方,話草案嘅立法其實應該根據科學定觀感呢?局方就解釋話所謂「堅信加熱煙嘅害處比傳統煙少,所以要合法銷售」嘅理據並未存在,反指好多地方加熱煙已經大行其道,議員係咪要等香港都出現同樣情況呢?
之不過,經過一輪對答,議員同官員都未能互相說服。劉國勳就話局方純粹憑感覺判斷,批評局方無法提供加熱煙有幾多害處嘅數據,憑感覺就禁止可以好大鑊。官員亦都唔服氣,即刻反詰問,是否觀感上加熱煙冇咁大味、冇咁大煙就等於冇咁有害,繼而可以正正式式咁喺市場上售賣呢?劉就話事實上大家都係口水戰,堅稱政府未能證實害處,只係憑感覺禁止,立場上好難支持政府囉!
另一個戰場就係議員吳永嘉同官員嘅爭論喇。佢話全球已有64個發達國家基於科學數據允許加熱煙產品銷售,又引述內地嘅科學研究報告指,加熱煙釋放嘅有害物質較傳統香煙少9成,建議政府以科學態度面對,唔好憑感覺或者靠估喇。
官員就話釋出有害物質較少唔代表害處較少,隨即又引起議員反彈。委員會主席黃定光話,其實煙仔咁罪惡點解唔禁埋傳統香煙?吳永嘉幫手接,話其實鹹魚同午餐肉都致癌,點解唔禁埋呢?
雖然大家都知道議員只不過揶揄官員,並唔係真係想禁止午餐肉,但明顯議員對官員未有提供數據,同埋回答方式都唔滿意。官員就話會將幾位議員嘅意見,帶返去畀陳肇始考慮,睇嚟食衞局官員下次都要做足功課先開會喇。