政Whats噏：工務小組表決4個項目　在席議員不足要點人數

立法會工務小組委員會今早(24)召開會議。過往兩個鐘個會議成日都要加時15分鐘先夠時間表決，但今日全部4個項目皆順利表決，去到最後一個項目時發現法定開會人數不足，要響點人數鐘啊。

委員會今日只係開咗1小時45分鐘，第3個項目西九龍填海計劃主要工程，位於深水埗深旺道與欽州街西交界處嘅行人天橋，只係討論咗短短11分鐘就表決。去到第4個項目，荃灣及葵涌鹹水供應系統改善工程，甚至無議員發言提問。工程界議員盧偉國解釋，因相關工程已經係事務委員會同議會外都有同政府溝通，認為工程重要必需要進行。

不過，由於當時只有盧偉國同陸頌雄兩位議員，加埋主席謝偉銓都只得3個人，謝偉銓惟有響起點人數鐘傳召委員返嚟會議室開會，好彩點人數鐘響咗40秒左右，議員張宇人同麥美娟就行入嚟會議室，先夠人表決啊。