政Whats噏：張亮任降低食物中鹽和糖委員會主席　下月中生效

政府成立嘅降低食物中鹽和糖委員會，現屆任期即將屆滿，委員會今日(26日)召開記者會，社創基金「全城街馬」創辦人張亮，將接任委員會主席並由下月15日履新，職務為期3年，至2024年3月14日為止。

委員會提到，疫情為佢哋嘅任務帶來莫大挑戰，如原本同多間學校及飯盒承辦商合作，致力為學童提供低鹽、低糖飲食。然而早前長期停課，目前就返半日學，無法向學生提供有關午膳。另原本亦同超過千間食肆合作推廣低鹽、低糖嘅健康飲食，可惜唔少餐廳喺疫情下倒閉，影響委員會嘅工作。

儘管有負面影響，但張亮認為疫情喚起大眾對健康嘅關注。因留在家中機會較多，唔少人都變成「廚神」，相信比起外出用膳，可減少攝取鹽及糖分。張又關注好多棲身於劏房嘅低收入家庭，受環境所限甚少下廚煮食，令有關人士嘅肥胖問題較嚴重，希望委員會將來能集中精力嚟改善呢個現象。