政Whats噏:福利政策做得差 羅致光被轟離地猶如身處冥王星

20210226
東網電視
更多新聞短片
有議員要求何啟明無論搭穿梭機抑或坐火箭,都要捉離地到冥王星嘅羅致光去開會。
現屆政府過去一直被轟離地,但議員批評官員離地嘅程度,可能有新嘅標準。今日(26日)立法會一個小組委員會上,多名議員不滿勞工及福利局局長羅致光唔肯出席會議,又鬧爆本港長者福利政策做得太慢,又唔肯援助失業市民,炮轟羅不食人間煙火,離地到喺冥王星!
會議一開始,議員鄭泳舜(Vincent)就批評羅缺席會議,又乘機痛斥勞福局唔肯搞失業援助金、60至64歲「兩蚊搭車優惠」又做得太慢。副局長何啟明就答話局長都聽到意見,又強調喺局內有作討論,無論由局長答抑或由佢答都冇乜差別。Vincent當然不滿,叫局長得閒落吓區、感受吓民間疾苦,又批評政府做事態度,形容若果有決心做,就算有100樣困難都做得到,仲叫政府就算唔做,至少都應該講吓人話。而何就繼續幫上司辯護,話佢都願意落聽市民意見喎。
Vincent就愈講愈扯火,指何作為副局長,起碼仲係地球人,但就鬧爆羅作為局長,唔止喺火星,而係遠在冥王星,炮轟佢不食人間煙火,仲叫何諗吓辦法,坐穿梭機又好,坐火箭又好,都要捉返喺冥王星嘅局長返嚟,等佢知道地球發生乜事。何回應時就講笑話,覺得所有人都係地球人嚟嘅,冇人會係外星人咁話。
作為該小組主席嘅柯創盛(柯仔)亦強烈不滿羅冇出席會議,質疑政府係咪真係有心改善行政立法關係,仲大數勞福局嘅文件無回應議員早前嘅要求,狠批當局Hea覆。佢又提到,政府依家一再強調行政主導,寄語做事時要更加有為,最緊要食人間煙火。何再答多次嘴,笑言佢哋平時都要食熟飯,都係人間煙火喎。
另一位議員郭偉強,就狠批政府做事踢一踢、郁一郁,又指斥當局成日形容改動政策會牽一髮動全身,笑言係咪仲要搵返條頭髮喺邊,嘲諷政府莫非真係咁弱雞?佢又重提政府曾承諾會喺「智方便」中加入長者福利措施,批評到依家都無影,仲話當局最終是否答應議員嘅要求,都要得局長首肯,叫下次都係搵返局長上嚟,否則只係棧搞。最終柯仔就提出叫秘書去信羅或政務司司長,敦促羅下次嚟開會,獲得在席議員一致通過。