政Whats噏：陳茂波專屬座駕「死火」　臨陣轉坐南韓車

政府高官均依賴專屬座駕出入，而財政司司長陳茂波今日(27日)完成電台訪問之後，座駕突然「死火」，需要轉乘一輛南韓品牌嘅私家車。

陳茂波(財爺)今朝出席電台節目嗰陣，乘坐車牌「FS」嘅黑色座駕抵達電台，繼續為新一份財政預算案「解畫」。但當佢完成咗大約1個鐘嘅節目，司機準備揸車接載時，突然發現座駕「死火」。需要臨時改由另一位司機，駕駛一輛南韓牌子嘅私家車接載。雖然同樣係政府車輛，但由日本「凌志」品牌改為南韓品牌「起亞汽車」，層次有所唔同，亦唔係皮革座椅。

司機事先將前方座椅刻意調前，等後座嘅財爺坐得舒服啲，不過車內空間明顯都係比較狹窄，東網記者專程問財爺「坐得慣唔慣」，佢就笑而不語。