政Whats噏:鄭若驊被批算農曆10月官職動搖 唔通要問責下台?

20210228
東網電視
更多新聞短片
政府無能,搞到香港立立亂!早前都講過,香港術數家協會術數師楊子東為多名問責局長批算運程,上任以來醜聞纏身、被嘲為「避政司司長」嘅律政司司長鄭若驊嘅運程更差,楊師傅話鄭會瞓唔到覺失眠,甚至有機會官位受到動搖添呀!
話時話,鄭若驊甫上場已經醜聞纏身,民望更長期「墊司底」,外界要求佢問責落台嘅聲音不絕,原來佢喺牛年嘅運程都係好差㗎!楊師傅話鄭若驊嘅八字屬強水命,農曆二月鄭嘅身邊就會有小人是非。以為小人是非已經好差?未算呀!楊師傅話去到農曆三月時,鄭會隱隱地覺得身邊有啲事唔妥,仲會因為咁而失眠,無覺好瞓;去到農曆六月,佢嘅工作亦會面對好大壓力,職場內部更係會面對兩個勢力嘅鬥爭。
下半年又點呢?楊師傅話鄭嘅運程愈嚟愈差,農曆七至八月會發生好多對佢不利嘅事。去到農曆十月,由於鄭嘅八字屬強水命,十月對佢嚟講就太多水喇,佢受唔住,就連佢嘅官職都可能受到動搖。鄭嘅運程可謂衰到年尾。
鄭若驊嘅表現有幾差,大家有目共睹喇!正如佢嘅民望長期「墊司底」,都係事出有因。實際上,外界經常批評鄭「龜縮」做「鍵盤戰士」,懶做法例解說工作。對外做唔好,對內亦管理不善,佢上任至今僅3年,已有4名律政司高層「跳船」,據悉,律政司有大批人手流失,單計前年及去年,律師職系已有33人離任,仲有請辭員工明言同鄭意見不合。
唔單止員工頻頻跳船,律政司檢控官翁達揚喺前年更出版一本法律常識書籍,教導疑犯「避開法律陷阱」,猶如「黑暴秘笈」,令外界嘩然,翁其後被調職,最後更辭職。呢件事好明顯係內部管理不善。
前年嘅反修例示威至今超過1年半,大量案件積壓,偏偏鄭仍然歎慢板處理。各界亦紛紛批評鄭辦事不力,理應問責下台!楊師傅話農曆10月鄭嘅官職有動搖,係咪會做唔完呢屆任期呢?咁大家就要拭目以待嘞!