政Whats噏：寧不開會都要去撐47泛民場　西貢區會民主派爆分歧　

47名泛民人士因組織或參與舊年嘅民主派「35+」初選，早前被指涉觸犯《港區國安法》繼而遭起訴後，法庭今日(2日)繼續審訊案件。由於多位被告為現任區議員，所以尋日部分地區嘅區議會開會時，都有區議員喺會上提及案件。其中西貢區民主派區議員就應否繼續開會嘅問題上爆分歧；黃大仙民政事務專員(DO)亦不滿有區議員展示涉違法嘅標語，兩度拉隊離場；而元朗區議會一個委員會就因過半數區議員請假，而要改期舉行會議。

話說西貢區議會今日(2日)召開大會，由於該區區議會主席鍾錦麟、區議員范國威及柯耀林同為案件被告，於是會上有民主派區議員認為唔應該開會，反而係到法庭聲援佢哋，亦有人隨即提出休會動議。雖然該區區議會由民主派主導，但係該動議未獲在席3分之2區議員支持而被否決。

見到呢個結果，區議員葉子祈就直接點名批評另外3位區議員陸平才、謝正楓及李嘉睿未有舉手支持休會，更指佢哋有份參與「顛覆國家政權」嘅活動，反問如果咩都唔做，以後邊個為佢哋發聲。陸即反駁指，至今都未畀警方調查或拘捕，又對葉再次污衊自己感遺憾，希望對方收回言論，如對方有證據亦可舉報。

見到會上區議員出現內訌，主持會議嘅副主席周賢明就即刻做「和事老」，話喺自由民主嘅社會，每個人都有唔同取向，呼籲在席區議員互相尊重，又話坐喺到開會唔代表唔支持一眾被告喎。最後會議進行約2小時後，就因無足夠法定人數而流會。

至於喺黃大仙區議會大會方面，該區區議員劉珈汶(Carmen)今(2日)開會時，就喺座位前張貼「欲加之罪，何患無辭」、「磊落做人，一生平安」，「停止政治迫害」及「釋放47人」嘅標語。不過會議開始僅10幾分鐘，DO黃智華就突然話標語涉違反《基本法》以及「一國兩制」原則同國安法，率領部門代表離席直至對方移除標語。

及後Carmen同其他區議員都認為議程中涉多項民生議題，經衡量後決定先移除標語。事隔20分鐘左右，黃智華再同部門代表進場出席會議，但Carmen就不滿黃嘅指控，質疑「DO幾時變成DOJ(律政司)」，要求對方解釋邊句標語違法。但黃就唔滿意會上討論呢個話題，再次拉隊離場，最終會議亦要提早休會。

另外，元朗區議會轄下嘅文、藝、康、體、福利、教育及治安委員會原定今日(2日)下午開會，但因為有過半數區議員書面或口頭通知因事無法出席會議，所以要改期舉行。唔知會唔會喺案件完成審訊前，類似嘅情況都會不斷發生呢？